Fyrsta manslið hjá ÍF Føroyum høvdu úr at gera í síðstu viku. Teir spældu nevniliga 3 dystir uppá 5 dagar, og tað var ikki sørt hendingaríkt:
Týsdagin 4. oktober tóku menninir ímóti KSI Håndbold. KSI minnir nógv um ÍF Føroyar, av tí at liðið primært er mannað við fólki, ið er undir lesnaði.
Áðrenn dystin var ringt at meta um, hvussu væl KSI vóru fyri, av tí at tað enn er so lítið fráliðið út á kappingarárið, men eingin bleiv undirmettur.
Tá dysturin varð floytaður í gongd, vóru menn til reiðar og løgdu seg framum 1-0. Eftir hetta gingu tó heili 20 minuttir, áðrenn ÍF Føroyar aftur vóru á odda 9-8. Fýra minuttir seinni mátti Julian Olsen fara av vøllinum við skaða. Hetta kom illa við hjá ÍF Føroyum. Hetta tí, at bert tríggir bakspælarar vóru tøkir til dystin, har ein teirra eisini stríddist við skaða áðrenn dystin.
Hálvleiksstøðan var 14-14.
Í byrjanini av seinna hálvleiki mátti venjarin, Eirikur Simonsen, seta ein vong í bakketuna. Tað ávirkaði tó ikki hondbóltsspælið stórvegis. Dysturin svingaði nógv aftur og fram, hondbóltspælið var fylt við tekniskum feilum, og nógvar útvísingar vóru.
Tá 5 minuttir vóru eftir, var støðan 25-23 til okkum, so alt bendi á, at tað fór at verða ein spennandi dystarendi. Tað vísti seg at vera rætt, tí tá tíðin var farin, var støðan 25-24 til ÍF Føroyar – tó fekk KSI eitt 3-meturkast. Tíbetur varð skotið við síðunar av málinum, og menninir hjá ÍF Føroyum fingu sostatt tvey stig.
Sum heild var dysturin øgiliga lívligur við nógvum tekninskum feilum og ið so hørðum verjuspæli, sum førdi til nógvar útvísingar. Menninir kunnu tó vera stoltir av stríðshuganum, ið at enda gav tvey stig.
Tveir dagar seinni vóru menninir longu í eldinum aftur, hesaferð í steypakappingini. Dysturin var á útivølli langt vekk móti Lammefjorden HK, sum føroyingarnir høvdu leikt ímóti í farna kappingarárið; tá spældu liðini javnleik í Lammefjorden, so lagt var upp til ein spennandi og javnan dyst.
Føroyingarnir vóru noyddir at gera nakrar útskiftingar í hópinum frá seinasta dysti, vegna skaðar og forfall, men liðið var tó enn rímiliga sterkt.
Dysturin byrjaði sum væntað rættiliga javnt, bæði liðini fylgdust væl fyrsta korterið, og eingin var frammanfyri við fleiri enn 2 málum hesa løtuna. Bæði liðini skoraðu væl, og leikferðin var høg, so tað komu heilt nógv mál fyrstu løtuna, og eftir 15 min vóru føroyingarnir á odda 9-8. Nýggja manningin gjørdi at Eirikur Simonsen á venjarabonkinum valdi at royna eina 5-1 verju frá byrjan, men valdi seinni at fara niður í eina 6-0, og hetta hjálpti uppá verjuna. Restina av hálvleikinum vardu føroyingarnir heilt væl, og tað førdi við sær at kontraspælið kom upp at koyra, og móti endanum av fyrra hálvleiki fingu føroyingarnir tí uppbygt sær eina góða leiðslu, so hálvleiksstøðan var 10-17 til útiliðið.
Hetta gjørdi uppgávuna eitt sindur nemmari, og avgjørt var at halda fram við sama leisti í seinna hálvleiki.
Tað eydnaðist eisini heilt væl, og leiðslan kom skjótt uppá 10 mál, og eftir hetta var spenningurin farin úr dystinum, mótstøðuliðið møddist og fingu ikki loyst verjuna hjá føroyingunum upp, og ÍF Føroyar kundi koyra við cruise control restina av dystinum, sum endaði 17-30. Dagsins leikari var toppskjúttin og nýggja stjørnuskotið á liðnum, Ivan Mrdalo, sum leikti ein framúr dyst.
Menninir eru tí víðari til annað umfar í steypakappingini har teir koma at møta IF Frem Bjæverskov sum spæla í einari deild niðanfyri 1. manslið, so her mugu føroyingarnir átaka sær favorittrolluna.
Eftir dystin hóskvøldið var pausa heilt til sunnudagin, har ÍF Føroyar skuldi til Herlev at spæla dyst í 3. División aftur.
Aftur hesaferð manglaðu leikarir, og bakketan var eitt sindur tunn, og hetta gjørdi at Bartal Klein Olsen, ið leikti sín fyrsta dyst eftir skaðasteðg í væl meira enn eitt ár, varð tveittur fyri leyvurnar og mátti spæla mestsum allan dystin á tamb.
Føroyingarnir vistu lítið og onki um mótstøðuliðið Herlev/Hjorten áðrenn dystin, men frá fyrsta bríksli var eyðsýnt, hvat teirra stóra stykri var. So skjótt sum teir fingu bóltin vóru teir sera kvikir at renna fram við nógvum monnum og stórari ferð, og hetta tók eitt sindur føroyingarnar á bóli. Hetta merkti at teir skjótt fingu eina lítla leiðslu, men føroyingarnir hildu høvdið kalt, og fingu spælt seg inn í dystin aftur, hóast kontraspælið hjá Herlev enn varð eyðsýnt, og føroyingarnir løgdu seg framum aftur, og tá hálvleikurin kom, vóru ÍF Føroayr á odda 11-15.
Hálvleiksprátið snúi seg um, at halda fram við góða álopsspælinum sum riggaði væl, og so renna skjótt heim tá bólturin bleiv mistur.
Tá annar hálvleikur varð bríkslaður í gongd tyktist tó ikki sum um føroyingarnir vóru komnir út á vøllin aftur, og heimaliðið skoraðu 4 mál uppá 2 minuttir og so var longu javnt aftur og føroyingarnir máttu byrja á nýggjum. Eftir hetta gjørdist tað ein sera spennandi dystur har bæði liðini skiftust um at vera frammanfyri, og føroyingarnir fingu ikki álopsspælið at koyra líka væl sum móti endanum av fyrsta hálvleiki. Nógvar tekniskar villur hvødu við sær skjót mál í hinum endanum til heimaliðið, og tá Rúni Vest Højgaard mátti út við skaða vóru góð ráð dýr um hvør skuldi spæla í bakketuni. Inn á høgra bakk kom Bergur Ákason, sum vanliga hevur leikt vongur, og skuldi tað vísa seg at rigga sera væl. Hann breyt ferð eftir ferð ígjøgnum á uttarusíðu á bakkinum og skoraði, og helt hann føroyingunum inni í dystinum. Hóast hetta, so hevði heimaliðið spælt seg til eina 2 málsleiðslu tá 1 minuttur var eftir, og tað sá svart út. Bergur fekk minkað um munin, og so mátti satsast eitt sindur í verjuni. Hetta førdi við sær at ein Herlev maður var spældur heilt fríur inni á strikuni og kundi avgera dystin. Men í málinum stóð Tóraldur Kollsker, fyrrverandi formaður og aftur úr útlegd í øðrum feløgum, og hann gjørdi eina rimmar bjarging, og føroyingarnir fingu bóltin aftur. Nú var hálvur minuttur eftir, og føroyingarnir runnu fram í álop, og skjótt var ein fríur maður, men ólukkutíð brendi hann og alt sá út til at vera tapt. Men Herlev maðurin ið fekk fatur í bóltinum byrjaði at dribla, og varnaðist ikki Pætur Thomsen, ein annan nýggjan mann í felagnum, ið kom frá síðuni og slóð bóltin frá honum. Bólturin trillaði beint fyri føturnar á Bartal, sum stóð óvardur og kundi renna beint móti málinum, og smekka bóltin í netið og javna. Tá vóru nøkur sekund eftir, men Herlev spældu bóltin burtur í álopinum, og so kundu føroyingarnir fegnast um eitt stig, sum minuttin áðrenn sá rættiliga ósannlíkt út.
Hóast eina stigið, so iðraðu onkrir seg um, at lata mótstøðuliðið inn í dystin aftur, men sama ger, trúgvin uppá at teir taka hesar næstu ferð er stór, og vónin og væntanin um eitt toppláss er als ikki burtur hjá føroyingunum.
Bergur Ákason varð valdur til dagsins leikara eftir eitt flott innhopp á bakkinum, og var tað væl uppiborið.
Næsti dystur er eftir heystferiuna á heimavølli 29. oktober móti Øresund Håndbold.