Týskvøldið 24. januar skuldi fyrsta manslið hjá ÍF Føroyum spæla 4. rundu í steypakappingini. Dianalund úr 2. deild kom á vitjan.
Síðsta ár spældu Føroyar og Dianalund tveir dystir ímóti hvørjum øðrum, og Føroyar vunnu dystin heima og taptu úti. Nógv fokus var á hesum dystinum, tí ÍF Føroyar hevði megnað at spælt seg so langt í kappingini.
Dysturin byrjaði væl fyri Føroyar og skjótt var leiðslan 5-6 mál. Sera høgt tempo var at byrja við, og tað gagnaði Føroyum væl. Verjan stóð stinn og aftanfyri verjuna stóð ein framúr væl leikandi Hørður Trygvason í málinum. Í hálvleikinum vóru Føroyar á odda við 8-10 málum.
At leiðslan var so stór til Føroyar í hálvleikinum var ikki væntað av leikarum áðrenn dystin. Nú var umráðandi at halda fokus, og spæla væl teir síðstu 30 minuttirnar, og tað legði venjarin, Eirikur Simonsen, stóran dent á í hálvleikinum.
Seinni hálvleikur byrjaði sum fyrsti endaði, Føroyar bygdu omaná stóru leiðsluna, og luftin var langt síðan runnin úr ballónini hjá Dianalund. Føroyar vunnu dystin trygt 33-19.
Dagsins leikari bleiv av leikarum og venjara valdur at vera Hørður Trygvason.
Í 5. umfari í steypakappingini er tað HC Odense sum eigur tørn, teir spæla í 2. deild.
Eftir Berg Ákason