Eftir eina langa jólafrítíð, skuldu mennirnir spæla á KU sunnudagin móti KSI, sum er Københavns Universitet Studenteridræt. Fleiri hava verið í Føroyum alla ta fyrstu vikuna í januar, so enn hevur eingin venjing verið. Síðsti dystur var 10. desembur, so áðrenn dysturin byrjaði var avtalan at byrja dystin í lágari ferð, fyri at banka tann ringasta rustin av okkum. Styrkin hjá liðnum í ár, hevur annars verið høg leikferð, við nógvum skjótálopum.
KSI byrjaði eisini dystin betri, og førdi við 1.2 málum fyrsta korterið. Teir vóru vælvaksnir, og teirra tríggir skjúttar knallaðu langskotini í málið, sum teimum lystu. Sum fyrri hálvleikur leið, fingu føroyingarnir meir ferð á sítt spæl, og tá verjan bleiv broytt frá 6-0 til 5-1 við Bartali Klain Olsen sum eittara, kundu vit fara til hálvleiks við einari lítlari leiðslu, 14-15. Flestu málini komu eftir skjótt krússspæl, har tað sum oftani endaði við at Niels Jákup Egholm ella Rune Olsen stóðu fríir á strikuni.
Seinni hálvleikur gjørdist heilt øðrvísi enn fyrri. 5-1 verjan tók fullkomiliga broddin av stóru skjúttunum hjá KSI, og hetta varð gagnnýtt við nógvum skjótálopum. Tá eitt korter var farið, vóru 10 mál á muni, og dysturin varð avgjørdur. Konsentratiónin dalaði eitt sindur síðstu løtuna av dystinum, men hóast hetta hildu vit málmunin, og vunnu trygt 24-33.
Ein av undangongumonnunum á liðnum og í nevndini seinastu nógvu árini, Torstein Balle, hevur pakkað kuffertið og er fluttur til Føroyar. Hann hevur havt nógvar álitisuppgávur, og hesar eru nú deildar út til aðrar. Tað gekk ikki ein dystur, áðrenn hetta merktist – bóltarnir sum vit hita upp við lógu eftir. Og 15 minuttir áðrenn dystarbyrjan var Torstein uppringdur, fyri at hjálpa at skriva dómaraseðilin. Tann týdningarmesta uppgávan hjá honum var tó hansara trygga vinstra hond – hesa uppgávuna hevur Ivan Mrdalo av sínum eintingum valt at tikið á seg, tó við munandi verri útfalli. Tað verður saknur í Torsteini, tað er vist.
Næsti dystur er leygardagin 14. januar á heimavølli móti VSH.
Eftir Tummas Paula Hanusarson